بسم الله الرحمن الرحيم
أتوجه بجزيل لجميع من مر وأضاف وعقب على هذا الموضوع الجميل
نستكمل بعون الله تعلم اللهجة الحلبية السورية،طبعاً نسيت أقلكن على شغلة مهمة،وهي أنه الغالب على لهجة أهل حلب هو التفخيم،والترقيق نادر جداً جداً جداً،وبالنسبة للمفردات يلي عمنجيبها ومنترجمها،فهي المفردات يلي تعتبر غريبة ،أما باقي الكلمات رح تكون سهلة ومفهومة ان شاء الله،وفي أمر تاني مهم،اللهجة الحلبية تعتبر أصعب لهجة بسوريا،ويلي بيفهمها رح يفهم لهجات أكتر المحافظات السورية متل الشام وحمص وحماه وغيرها كتير،وهلأ منبلش بدرس اليوم، بس قبل ما نبلش مننصح بالعودة للدروس السابقة لأنه كله مرتبط ببعضه ولابد حتى من مجرد الاطلاع،أول الشي رح نعطيكن قواعد نحوية،بالنسبة للفعل المضارع،صيغته العامة هي الفعل مسبوق بحرف العين ،بس لما بيكون الكلام موجه للمخاطب وللغائب رح بتكون عين وباء،أما إذا كانت للمتكلم فصيغتها العامة هي عين وميم أو عين وباء،ومنوضح بالأمثلة:
المتكلم:أنا عبّاكل،نحن عمنمشي ،نحن عمنشرب ....
المخاطب:أنت عبتكتب،أنتي عبتكتبي....
الغائب:هو عبيسمع،هنن عبيشوفوا...
في قاعدة نحوية تانية،بالنسبة لهاء الغائب على الأغلب بتنحذف إلا نادراً،منوضح بأمثلة:
خذيها:بتصير خديَّا،اشربيها:اشربيا،شوفوهم:شوفوُّن،لها:إلا ،بدون تشديد على اللام،له:إلو، بدون تشديد كمان،لهم أو لهن:إلن،شوفه:شوفو،اضربه:اضربو
وكمان منذكر قاعدة نحوية تالتة ،بالنسبة لاسم الفاعل صيغته بشكل عام بدل فاعل هي فيعل، ومنوضح بشوية أمثلة:
بَرَدَ:بارد :بيرد.
شَرَدَ:شارد:شيرد.
أكل:آكل:إيكل.
وكمان منذكر قاعدة نحوية رابعة هي أنه ميم الجمع بتصير نون،مثل منكم:منكن.
وهلأ رح ناخد مفردات غير يلي أخدناهن سابقاً مع الترجمة:
كيلة+صطلِة+معه وَشِّة:أهبل أو مجنون،والوشِّة من التشويش.
إجته الساعة:إجته يعني جاءته،وإجته الساعة يعني نوبة الصرع بعيد الشر عنكن
دويرينة+عصفورية:مستشفى المجانين.
حرامي:لص،ولكن حسب موقعها من الجملة،يعني هي بتجي بمعنى تاني،شلون بدي أقلكن مممم،خلينا نفترض مثلاً أنه واحد منكن بده يشغل مروحة مع مدفأة كهربائية على نفس مأخذ الكهرباء،القطعة البلاستيكية يلي منستعملها لحتى نحط عليها أكتر من آلة كهربائية نحن منسميا حرامي.
بانجان:باذنجان
مشكلجي:صاحب مشاكل.
نسونجي:زير نساء .
مَسْكَرَة:مكحلة.
يْقَسِّم:مصدرها تقسيم،فلان بيقسِّم علينا يعني بيستعرض عضلاته وبينفش ريشه ونذكر بأن القاف بالحلبية همزة .
خَنَّق:احمر وجهه.
نجق:فلان نَجَق فلان يعني أهمله ومو معبره.
كَلَبْشة:القيد في اليد يستعمله رجال الشرطة.
هبريونات(البي هنا تلفظ مثل الpبالانكلش):مصدر سماع المواد الصوتية في الحاسوب غير التي توضع في الأذن مفردها هبريونة.
صُوبًّا:مدفأة سواءاً كانت على الكهرباء أو على أي مصدر تاني.
بق:الحشرات الصغيرة الحجم يلي بتقرص وبتخلي الجلد يحك،مفردها بقاية.
جاي:مفخمة طبعاً شاي،وحرف الجيم متل ما قلنا بينلفظ متل chبالإنكليزي.
شحّاطة:صندل ما يلبس في القدم.
طيارة:هي الطائرة وإلا معنى تاني هو الصفعة على الرقبة لما بيكون الواحد منزل راسه، يعني منضربه طيارة على رقبته ومنقله:مطارك فاضي.
مشندل:مشنطط يعني بمعنى مشرد وعبيعاني.
مْصَيِّف:هي معناها ضد مشتِّي،بس حسب موقعا من الجملة بتاخد معنى تاني يلي هو جدبة أو صطلة أو مسلوب أو جاييته الساعة .
تتغندر+تتغاوى(للمرأة أمام زوجها أو محارمها):تتزين.
كول هوا:كول يعني كُل مصدرها الأكل،هوا يعني الهواء،وكول هوا تُقال لمن يتكلم بكلام مزعج،يعني بمعنى اسكت .
علِّك:فعل أمر من العلكة ومصدره عْلًاك واسم الفاعل علَّاك يلي هو مبالغة اسم الفاعل ومافي عالك، تقال لمن يتكلم بكلام مزعج بمعنى ضع علكة واعلك أحسن من ها الحكي،وجملة "علاك مصدّي"مصدّي من الصدأ،يعني كلام بايخ وماله طعمة .
سِد نِيعك:أغلق فمك .
بُوظ:جليد.
بيشهنق:ينهق للحمار حاشاكم.
بيعّوي:ينبح للكلب حاشاكم.
بتنوّي:مواء القطة.
نشِح:وسخ حاشاكم،والمتوسخ مْأَنْشِح وأحياناً منقله مِيشِح.
شحوار:الهباب الذي يخرج من المدافئ التي تعمل على الوقود،وهو يعادل كيميائياً المركب coأول أوكسيد الكربون.
جَبَّانِة:مقبرة.
مجدرة:كوشري بالمصري.
فلافل:طعمية بالمصري.
عفس:تأتي بمعنى دهس بسيارة ونحوها،وتأتي بمعنى الضرب،يعني فلان بده يعَفِّس فلان تعفيس يعني بده يهري بدنه بالضرب أو يكومه تكويم.
الكِرّ:صغير الحمار حاشاكم.
البطيخ:هو الشمام يلي داخله أصفر،وأما يلي داخله أحمر منقله جَبَس للجمع والمفرد جَبَسِة.
إش عليه:وماله+وماذا في ذلك.
حربوق:حذق ،ومتل ما قلنا باللهجة الحلبية القاف بتصير همزة.
البسكليتة يلي هي الدراجة الهوائية منقلها أحياناً مسْليكة.
بالع جريدة:تقال لمن يثرثر ويكثر بالكلام ونذكر بأن صيغة اسم الفاعل هي فيعل يعني بالع جريدة بتصير بيلع جريدة وأحياناً منقله بيلع إذاعة أو بيلع مونتي كارلو.
طشِم:غبي،ومنقله كمان طَشِّة.
ديوانة:الكنبة التي في غرفة الضيوف تتسع لجلوس أكثر من شخص.
تَخْتْ:سرير،لاحظوا أنه السواكن بغير محلها بس يلي ما بيصير عند الحلبية بيصير.
مخه مصطم:استيعابه بطيء.
ميكن:بقوة +قوي+متين،جامد بالمصري.
عَبْيِصْوِي:بيزعق بالمصري والله أعلم ،بس هو عبارة عن صوت المرأة العفو منكن يشابه طنة الأذن.
كَفْ:صفعة:ألم بالمصري،شلُّوط بالفلسطيني.
ومنعطيكن شوية إدغامات:
لَخِّيت:لك خيت:يا أختي.
لخَّاي:لك خاي:يا أخي.
لأَّنا:لك أنا:هو أنا، وبالمثل لأِّنتِ ولأِّنتوا .
كَفْ:صفعة:ألم بالمصري،شلُّوط بالفلسطيني.
ويرَّاي:هي عبارة عن وين +رايح ،مثال:ويرَّاي لَخَّاي:إلى أين أنت ذاهب يا أخي.
ويرَّايحة:هي عبارة عن وين+رايحة،مثال:ويرَّايحة لك يوم:إلى أين أنتِ ذاهبة يا أمي.
كلمات حديثة دخلت اللهجة الحلبية:
يتخورف:ينغدر،وهي من الخروف الذي يُذبَح ،فلان خورفني يعني غدرني بسعر سلعة معينة.
يسبّحه:من السباحة ،يعني يوعده بأمر معين ويماطل بوفاء الوعد.
وبها الشكل منكون بإذن الله خلصنا أساسيات اللهجة الحلبية يلي هي تعتبر أصعب لهجة سورية ومارح تصعب عليكن غير لهجات لأنه الفوارق طفيفة جداً،ولو أنه يلي قريتوه غير السمع و الشوف ،وجزاكم الله خيراً على المتابعة الطيبة والمرور الكريم وبارك الله في جمعكم الطيب.
سبحانك اللهم وبحمدك،أشهد ألا إله إلا أنت،أستغفرك وأتوب إليك.
وصلى الله على نبينا محمد وعلى آله وصحبه وأمهات المؤمنين ومن تبعهم بإحسان إلى يوم الدين وسلم تسليماً كثيراً.